新擴軍嘅世冠盃即將結束，同世界盃一樣，都會附設個人獎項「金球獎」，目前頂頭大熱門，就係幾年前嘅狼隊棄將、現時巴黎聖日耳門(PSG)葡萄牙中場核心域天拿。
個別博彩公司開出賠率所見，熱門前3名都係PSG球員，最熱係域天拿，只得2倍，次熱門係6倍嘅法比安彭拿，跟住係9倍嘅基華拉斯基利亞，至於最有機會得獎嘅車路士球員，要數到安素費南迪斯，佢同PSG嘅夏基美同祖奧尼維斯以13倍並列第4熱門。
照咁睇，PSG如果順利奪冠，域天拿將成為改制後世冠盃首位金球獎得主，躋身世界頂級球員行列。
25歲嘅域天拿波圖青訓出身，曾於2020至21年球季外借到狼隊，全季上陣22場僅入1球，之後狼隊放棄買斷而退回波圖，2022年獲PSG收購，轉會費4,150萬歐元，域天拿自此踏上青雲路，成為PSG中場核心，上季協助球隊成為「三冠王」，今屆世冠盃6場全部踢足，交出1入球2助攻，表現平穩，但成為金球獎頂頭大熱，就有啲意想不到。